नेपाली हास्यव्यङ्ग्य अनलाइन पत्रिका

लक्ष्मण नेवटिया :

निद्राको अँगालोमा
बाँधिन सबै आतूर,
दिन्छ शान्ति भरपूर
के मालिक के मजदूर
धनीलाई कोमल
डसना पनि बिझाउँछ
गरीब नीलो आकाशमुनि
पनि निदाउँछ।१।

निद्राले मिठो सपनाको
संसार सजाउँछ
कल्पनामा पनि नपुगेका
लोक घुमाउँछ
जागा हुदा फूर्ति, उमंग
र जोश बढाउँछ
निद्राको महिमा अपार
अदृश्य देखाउँछ।२।

दिनभरिका आवेग व्यथा
सबै बिर्साउँछ
उत्साह उमंग भरेर
बिहानीमा उठाउँछ
शक्ति गर्दछ संचित
ऊर्जावान बनाउँछ
थाकेको काँधबाट दुखको
डोको समाउँछ।३।

जीवनका दिनहरूलाई
आनन्द दिलाउँछ।
वृद्धजनका थाकेका
गोडा सुम्सुम्याउँछ।
चर्को झगडा, उग्र क्रोध
समेत भूलाउँछ
मुटु मुटुबीच ठोकिएका
किला हटाउंँछ।४।

सकल जगतको प्राणतत्व
या देवी सर्वभूतेषु
निद्रारूपेण संस्थिता।
नमस्तस्यै नमस्तस्यै
नमस्तस्यै नमोनम:।।

०००
विराटनगर