नेपाली हास्यव्यङ्ग्य अनलाइन पत्रिका

खोलाघरे साहिँलाे :

छ सम्पन्नलाई सधैं छूटतन्त्र
लुटेराहरूको चल्यो लूटतन्त्र
सुखी स्वप्न देख्नेहरू स्वप्न चाट
हरायो प्रजातन्त्र यो देशबाट ।

यहीँ जन्मिए, हुर्किए ज्यान मात्र
विदेशी भई डुक्रिँदैछन् कुपात्र
यिनैले लुटे देशको सान ठाँट
हरायो प्रजातन्त्र यो देशबाट ।

छ संस्कारमा,धर्ममा हस्तक्षेप
र साहित्य, सङ्गीतमा क्रूर ढेप
जबर्जस्त छन् गूट, प्यादा र भाट
हरायो प्रजातन्त्र यो देशबाट ।

खरानी घसेका निकै छद्म जोगी
विदेशी कृपाका अहोरात्र भोगी
दुरुस्तै बनी घुम्दछन् भेक, फाँट
हरायो प्रजातन्त्र यो देशबाट ।

कला, धर्म, साहित्यमा बाँध हाल्ने
दिलोज्यानले भ्रष्टमा छाँद हाल्ने
यिनैमा बन्यो बन्धकी राजपाट
हरायो प्रजातन्त्र यो देशबाट ।

हवेली झनै उच्च आकासिँदै छ
गरिबी अझै गर्तमा भासिँदैछ
भयो शान्तिको बन्द ढोका, कपाट
हरायो प्रजातन्त्र यो देशबाट ।

बडो शान दिन्छन् विदेशी गुलाम
यहीँका भने दीन छन् राम राम !
दुखे गाउँ, वस्ती, फपुरी, शैल, घाट
हरायो प्रजातन्त्र यो देशबाट ।

०००
फुएतप्पा, इलाम