नेपाली हास्यव्यङ्ग्य अनलाइन पत्रिका

घनश्याम रेग्मी :

लथालिङ्ग चाला भताभुङ्ग देश
सधैँ नै दुखेको छ माटो र भेष
अँध्यारो अझै हट्नको छैन छाँट
हरायो प्रजातन्त्र यो देशबाट ।

भुरे टाकुरे देखिए आज राजा
सधैँ मोज मस्ती सधैँ नाच बाजा
विकासे कुराका खुलेनन् कपाट
हरायो प्रजातन्त्र यो देशबाट ।

हिजो आज ढोङीहरू जाग्न थाले
सदाचारको बीज नै मास्न थाले
बढ्यो चोर गुन्डाहरूकै जमात
हरायो प्रजातन्त्र यो देशबाट ।

यहाँ पढ्न लेख्ने कतै ठाउँ छैनन्
युवा देशमा काम नै पाउँदैनन्
युवा जान्छ खाडी छ के रोक्न आँट
हरायो प्रजातन्त्र यो देशबाट ।

यता गाउँमा जङ्गलीमात्र बस्ने
भए गाउँ रित्ता र पैह्रो छ खस्ने
बिना कर्म खान्छन् डकारेर ढाँट
हरायो प्रजातन्त्र यो देशबाट ।

०००
२०८१/११/०७
प्रजातन्त्र दिवस