नेपाली हास्यव्यङ्ग्य अनलाइन पत्रिका

राजेन्द्र घायल :

आएथ्यो गणतन्त्र यो मुलुकमा के के न होला भन्यौं
बिस्तारै गुटतन्त्रमा बदलियो हामी भकुण्डो बन्यौं
पार्टी पार्ट र पार्टमा बदलियो जोडिन्न जस्तो गरी
हल्लन्छन् नटवल्टु पेच र किला खस्क्यो खियो बेसरी

धोती खुस्किगयो बिना शरमले हिड्छन् दले टाउके
देख्नेले त कुरीकुरी भनिसके निर्लज्ज छन् लाउके
देखिन्छन् कति झुण्ड झुण्ड तिनका सोझ्याउने रे दुनु
माझैमा रहने छ सोच सबको हेर्दैन कोही कुनु

हामी एक भयौं भनेर कहिले सेल्फी तिनै खिच्दछन्
पाउञ्जेल मजा लिंदै सँगसँगै मार्सी भुजा घिच्दछन्
ऐले फेरि मिलेन भाग झगडा पर्दै गयो बेसरी
छिर्के हान्न तयार छन् वचनका झर्केर आँखा तरी

आफै खाडलमा फसे मुलुकको के गर्दछन् उन्नति
पाए औसर यो तथापि तिनका सुधेन कैले मति
चल्दैनन् अब ती लडे सब सडे ब्याट्री बिनाका घडी
आफ्ना जीवनमा लगाउन पुगे आगो गए रे डढी

चिन्दैनन् तिनले भुले विगतका हौं कार्यकर्ता तर
भन्नै वाध्य भयौं विखण्डित हुने निक्र्यौल चाँडै गर
के नाप्यौ र जुटे पनि गुट बन्यौ बिन्ती छ झट्टै फुट
हाम्रो ख्याल नगर्नु टुक्र फुटको सर्वत्र मज्जा लुट ।

०००
घायलको घुयँत्राे (२०८१)