नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

राजा ल्याऊ र
नारायणहिटीमा राखौं ।

राजा ल्याएपछि
पिस्कोरमा जनताको घाँटी रेट्न पाइन्छ।
छिन्ताङमा रगतको होली खेल्न पाइन्छ ।
आजाद ऋषि देवकोटाहरुको हत्या गर्न मेसो मिल्छ
जेल सार्ने निहुमा,
सूर्यनाथ यादहरुलाई जंगलममा जिउँदै पुर्न सकिन्छ ।

राजा ल्याएपछि
ओखलढुङ्गाको टिमुरे ओडारमा
लोकतन्त्रवादीहरुको चिहान खन्न पाइन्छ
स्वतन्त्रताको आवाज उठाउने
क्याप्टेन यज्ञ ब.थापा र दुर्गानन्द झाहरुको
शिर छेदन गर्न पाइन्छ।

राजा ल्याऊ र
सुखनीको जंगलमा
जनअधिकारको कुरा गर्ने
रामप्रसाद र रामनाथहरुलाई झुन्ड्याऊ
कृष्ण सेन जस्ता जनकविहरुलाई
जेलभित्र कोच र कुटी कुटी मार।

राजा ल्याऊ र
नमिता सुमिता जस्ता छोरीहरुलाई
दरबारमा बुझाऊ
प्राचीन स्मारकहरुलाई
दरबारको क्रेनले उखेल र
विदेश भ्रमणमा पठाऊ ।

राजा ल्याऊ र
गैडा, हात्तीको व्यापार सुरु गर
गाँजाको व्यापार गर्न
रत्नपार्क र ठमेललाई
हिप्पी प्रदेश बनाऊ ।

राजा ल्याऊ र
नेपालको राष्ट्रियतालाई
कुम्भ मेलामा बिसर्जन गर।
मोदी र आदित्यनाथको
जय जयकार गर।
देशलाई सिक्किमीकरण गर।

राजा ल्याऊ र
फेरि एकथान मन्त्री, प्रधानमन्त्री बनाऊ
बिरोधी जनताको घाँटी रेट ।
पिस्कर र छिन्ताङ्गमा
फेरि एक पटक रगतको होली खेल।

राजा ल्याऊ र
देशलाई दिल्ली बुझाऊ।

नरहे बाँस, नबजे मुरली।

०००
हाल : जनकपुरधाम ।