नेपाली हास्यव्यङ्ग्य अनलाइन पत्रिका

हरि कोर्काली :

अब त म पनि
नेता बन्न
योग्य भैसकें नि ।
चाहिने जति
जुक्ति, बुद्घि र शक्ति जुटाएर
तयारी जति जम्मै पूरा गरिसकें नि ।

नेता बन्नकै लागि त मैले
भएभरको–
इमान बेचिदिएँ
जमान बेचिदिएँ
धर्म त्यगिदिएँ
नैतिकता भनिने पाजीको त
जरै मासिदिएँ
लाजसरमलाई पनि लगेर
घुम्रिएको पुच्छरमै टाँसिदिएँ
बाँकी रह्यो यही गोबर भरिएको टाउको
यस नाथेलाई पनि
चाबी सहितै लगेर
कम्फर्टेवल मूल्यमै
पारिका प्रभुका पाउमै पछारिदिएर
कोठीकी पुतली सरह नै नचाए हुन्छ,
नाचिदिन्छु भनिदिएँ ।

जाबो नेतै बन्न त, यहाँ
योभन्दा बढी के पो गर्नुपर्ला र !
नेतावाद – जिन्दावाद !
नेता बनेपछि त
जिन्दगीभर मार्सीभात ।

०००
भक्तपुर