नेपाली हास्यव्यङ्ग्य अनलाइन पत्रिका

राजेन्द्र घायल :

सारा व्यक्त भए यहाँ जति थिए दुर्वाच्य गालीहरू
हे भाषाविद हो बताउन कहाँ छन् शब्द त्यस्ता अरू
छिर्के हान्नुथियो नयाँ किसिमले शैली बदल्दै अझै
झाँको झार्नुथियो कडा वचनले गाली गरी कुर्लदै

जे जे भन्नुथियो भनेर सकिए ती तुच्छ वाणीहरू
पाए शब्द खुंखार झोक्किनुथियो ठोक्दै नयाँ डम्मरू
कुर्ली धीत मरेन क्रोध चुलियो साह्रै चिलायो मुख
शब्दैको अनिकाल भो र कसरी लागेर बस्ने चुप।

सेखी झार्न निफन्न हान्न बलिया गाली कहाँ पाउँला ?
ठेगाना दिनुहोस् कसैसित भए सोझै त्यता आउँला
यो दारा कटटट्ट किट्टिनगयो पोख्ने कहाँ गै रिस
गाली ट्यूसन क्वै पढाउँछ भने पढ्दै तिरौँला फिस

गर्ने हो प्रतियोगिता गजबको गाली महाउत्सव
पेले जन्मिन सक्छ यो मुलुकमा गाली विजेता अब
नौलो खेल छ यो भएर पहिलो नेपाल आयोजक
तानौं ध्यान समस्त विश्वतिरको ल्याऊँ नयाँ रौनक ।

०००
चितवन
घायलको घुयेँत्राे (२०८१)