कविराज घिमिरेवृद्ध
मन मन्दिर होस् श्रमवान् पुजियोस् छलकार नहून् अनुशासन होस् गरिमा रहने शुभकर्म चलोस् अनि वृद्ध सबैतिर टम्म फुलोस् ।।
कविराज घिमिरे
मन क्लान्त नहोस् सुखशान्ति मिलोस्
अपहेलितको क्षण शून्य बनोस्
परिवारसँगै दिल मुस्कुरियोस्
तब वृद्ध हुने पल झट्ट खुलोस् ।। १
मन अड्चनमा कहिल्यै नफसोस्
जसरी छ भलो उसनिम्ति चलोस्
छलछाम नुही हितको फल होस्
अनि वृद्ध हुँदा तपसी चुलियोस् ।। २
फलदायक हून् जति कर्म गरोस्
सृजना गतिला उपमा दरियोस्
मनमोहक त्यो व्यवहार पढोस्
गहनासरिको हुन वृद्ध बढोस् ।। ३
कमनीय बनाउन मित्र चुनोस्
मननीय जनाउन नित्य गुनोस्
सरितासरिको पन कञ्चन होस्
पृथिवीतलमा अनि वृद्ध घुमोस् ।। ४
मन मन्दिर होस् श्रमवान् पुजियोस्
छलकार नहून् अनुशासन होस्
गरिमा रहने शुभकर्म चलोस्
अनि वृद्ध सबैतिर टम्म फुलोस् ।। ५
०००
भक्तपुर
Subscribe
Login
0 Comments
Oldest
