नेपाली हास्यव्यङ्ग्य अनलाइन पत्रिका

जीवनाथ अधिकारी :

कालो सोच लिई घुम्छस्
ब्वाँसाको पनि बाउ ए
बिर्सिन्छस् गुनको भाका
नित्य चाटेर घाउ हे ॥ १ ॥

दायित्वहीन भै घुम्छस्
अर्कैबाट टरुन् सबै
कृत्याकृत्य बुझिस् कस्तो
आफू बाँचूँ मरुन् सबै ॥ २ ॥

उखुन्डो कपटी तेरो
चालामा स्वार्थगन्दगी
भयो बेकारको टन्टा
गन्धैगन्ध छ जिन्दगी ॥ ३ ॥

तँ हाँस्ता पनि हाँसोमा
विषका अणु छन् कति
बन्द छन् मनका आँखा
आसुरी मनु छन् कति ॥ ४ ॥

वय काँचो हुँदै हैन
बुद्धि पाकेन अन्यतः
ईर्ष्या पालेर के जल्नु
स्वयम् सिद्धिन्छ अन्ततः ॥ ५ ॥

आँखामा फूलका दृश्य
राखे देखिन्छ फूल नै
काँडाका दृष्टिमा हेरे
काँडैकाँडा जताततै ॥ ६ ॥

कुण्ठाले तँ अझै जल्छस्
कुण्ठा खोलेर फालिदे
भत्केको मनको प्वाल
विष फालेर टालिदे ॥ ७ ॥

०००
२०८२ असार २२
सिर्जनाकुञ्ज, बालकोट, भक्तपुर