नेपाली हास्यव्यङ्ग्य अनलाइन पत्रिका

रूद्र ज्ञवाली :

कुनै भन्छ टुक्रा गरी भाग लाउँ
कुनै भन्छ देऊ कलेजो म खाउँ
लुछी देश यो खान यी सल्बलाए
र, यो देशलाई खरानी बनाए।

थियो विश्वमा शान्तिको पूज्य ठाउँ
चिनारी थियो बुद्धको दिव्य नाउँ
बिरानो कुनै त्यो कहानी बनाए
र, यो देशलाई खरानी बनाए।

छ माटो सुनौलो धरा उर्वरा छन्
यहीँ स्वर्ण फल्ने पखेरा गरा छन्
सबै सिर्जनामाथि आगो खन्याए
र, यो देशलाई खरानी बनाए।

बोलाएर व्याधा चढाई सुपारी
छ यो राष्ट्रमा मृत्युको खेल जारी
यताका उताका हरामी जुटाए
र, यो देशलाई खरानी बनाए।

छ गोली उसैको निशाना उसैको
छ बोक्सी उतैको र धामी उतैको
सलाई उतैबाट कोरी पठाए
र, यो देशलाई खरानी बनाए।

दुखेको छ छाती कहाँ गै जँचाउँ
चढाउँ कहाँ चोट आफ्ना बिसाउँ
थुनी चोक नाका रत्यौली मनाए
र, यो देशलाई खरानी बनाए।

०००
भैरहवा
सीमान्त स्वर (२०८०)