नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

तिमी भुइँमा थियौ
तिमीलाई काँधमा उचालेर
माथि पुर्याउने म नै थिएँ।

जब तिमी माथि पुग्यौ
मेरो टाउकोमा बन्चरो हान्ने
तिमी नै भयौ।

जुन बेला तिमी भोको थियौ
आफ्नो पेट काटेर
तिम्रो पेटभरी दिने म नै थिएँ।

जब तिम्रो हैसियत बदलियो र
भुजा ज्युनार गर्ने भयौ,
मेरो पेटमा लात हान्ने
तिमी नै भयौ।

जुन बेला तिमी असक्त थियौ
तिम्रो यात्राको लट्ठी म नै थिएँ।
तिम्रो अलमलमा
तिमीलाई गन्तव्य देखाउने सारथी म नै थिएँ ।

जब तिम्रो साथमा नन्दीभृङ्गीहरुको
झुण्ड बाक्लियो
मेरो सदासयतामाथि आगो झोस्ने
तिमी नै भयौ।

विडम्बना,
आज तिमी सिसमहलमा छौ
अरुका घरमा ढुङ्गा हानेर
आत्मरतिमा मग्न छौ।

सिसाको घरभित्र बसेर
अरुलाई ढुङ्गा हान्ने
कुन राजा
इतिहासमा अकन्टक
भएको छ र ?

०००
गाेरखा