नेपाली हास्यव्यङ्ग्य अनलाइन पत्रिका

भाेजराज रेग्मी मुखाले :

जुँगा भन्नु जातीयता हो
जुँगा भन्नु नागरिकता हो।
जुँगा छ र नै जाँगर छ
जुँगा छ र नै शान छ।
जुँगा-जुँगाकै घमासान छ
जुँगा-जुँगामै खुट्टा तानातान छ।

जुँगा चलेपछि मिडिया चल्मलाउँछ,
र, पत्रकारिता चल्छ ।
जुँगा चिलाएपछि
क्याबिनेटको बैठक बस्छ।
जुँगा फर्फराएपछि संसद्लाई सनक चढ्छ,
र, बैठक अवरुद्ध हुन्छ ।
जुँगा बटारिएपछि
लैनचौरको रक्तचाप बढ्छ ।
जुँगा केलाएपछि
लाजिम्पाटलाई ज्वरो आउँछ ।

जुँगा मिले भने
काले-काले मिलेर
भाले पनि खान्छन्,
र, संविधान पनि बनाउँछन् ।
वैदेशिक सहयोग र अनुदान बढ्ने आश पनि हुन्छ
बजेट पास पनि हुन्छ ।

जुगा जुधे भने
पार्टी फुट्छ
बैरीको कपास फुट्छ
प्रहरीले सुन र लागुऔषध बरामद गर्छ
भित्रभित्रै चलखेल हुन्छ
सरकारको नीति तथा कार्यक्रम फेल हुन्छ ।
प्रशासनले व्यापारीको गोदाममा
छापा मार्छु भन्छ
बन्द, हडताल र चक्काजाम हुन्छ ।
धरोधर्म !
जुँगा जुधे भने कसैले कसैलाई गन्दैन
अरू कुरा गोली मार्दिनुस् ।
एक, दुई, तीन… नियम कानून केही भन्दैन ।
जुँगा-
देखिने पनि हुन्छ
नदेखिने पनि हुन्छ
नाकमुनिको जुँगा त नमुना मात्र हो
सबैभन्दा शानदार र शक्तिशाली जुँगा त
छातीभित्र गोदाममा हुन्छ ।

०००
सिनामङ्गल, काठमाडाैं