नेपाली हास्यव्यङ्ग्य अनलाइन पत्रिका

भाेजराज रेग्मी मुखाले :

१. काठमाडाैं
आडम्बर र अहङ्कारको बजार हो – काठमाडौँ
कसैको नाठो र कसैको जार हो – काठमाडौँ
स्वर्ग – नर्क यहीँ नै मरिकुच्चे भोग्न पाइन्छ
नहुनेलाई भालुको कन्पट, हुनेलाई रेष्टुरेन्ट एण्ड बार हो काठमाडौँ ।

२. पिरिम
तोरी र कोदोको पनि दुर्लभ पिरिम हुन्छ
अलिबार , गुरुत्वाकर्षणले लटपट पिरिम हुन्छ
तर, न तेल चुहुन्छ न त पिठो नै झर्छ
फूमन्तर गरेझैँ हेर्दाहेर्दै दुवैमा खटपट पिरिम हुन्छ ।

३. पालाे
कहिले सासूको पालो, कहिले बुहारीको
कहिले लोकदोहोरी, कहिले ओठेजुहारीको
आफ्नो पालोमा नफुर्किनू , नबौलाउनू कोई पनि
आलोपालो त रिमोटबाटै चल्छ है उ: पारिको ।

४. सपेरा
नियालेर हेर्नू , कालो बादलमा चाँदीको घेरा हुन्छ
सुअवसरले खोज्दै आउने जीवनमा एकफेरा हुन्छ
सुमार्गमा निर्भय निरन्तर लागिरहने हो भने
सर्प देख्दै सातो जाने पनि एकदिन सपेरा हुन्छ।

५. चेपारे जिब्रो र छेपारे वदन
गैँडाको छालाभन्दा जब्बर मन भएका
पाँच पुस्तालाई पुग्ने अकूत धन भएका
दिनमा दुगुना, रातमा चौगुन्ना बढ्याबढै पो छन् है !
चेपारे जिब्रो र छेपारे वदन भएका ।

०००
काठमाडाैं