नेपाली हास्यव्यङ्ग्य अनलाइन पत्रिका

कृष्णप्रसाद पौडेल `जस्ताघरे´

चिसो हावापानी वन चउरले शीतल छरून् ।
सबै नेपालीका मन मगजमा ईश्वर बसून् ।।
यहीँ झुल्के`मोती´प्रखर गुणका कौशिकसरि ।
रहून् हाम्रा मोती अति चहकिला भानु जसरी ।। -१

नदी खोलानाला नहर झरना आपस मिलून् ।
उनै `मोती´ डाक्दै विनयपनले निर्मल बनून् ।।
कुना थुम्का पाखा पनि अघि सरून् आदर गरी।
रहून् हाम्रा मोती अति चहकिला भानु जसरी।। -२

रमून् माटो ढुङ्गा बगर र धुरा पत्थर गरा ।
गुफा खोल्सा डाँडा अनि शिखर छन् सुन्दर धरा।
यहीँ जन्मे `मोती´मनुज कदको धारण गरी।
रहून् हाम्रा `मोती´अति चहकिला भानु जसरी ।। -३

चरून् चौँरीगाई वन विपिनमा हर्षित बनून् ।
सुगा मैना डाँफे मिलजुल गरी स्वागत गरून् ।।
पुजून् स्रष्टा `मोती´सकलजनले अर्चन गरी ।
रहून् हाम्रा मोती अति चहकिला भानु जसरी।। -४

रचे हिन्दी फार्सी गजल कविता सौम्य रचना ।
दिए अङ्ग्रेजीमा विविध रसका लेख्य सृजना।।
बने उम्दा `मोती´ अजयपथका भास्करसरि।
रहून् हाम्रा मोती अति चहकिला भानु जसरी।। -५

रचे नेपालीमा अझ असलका नाटक कथा।
दिए राम्रा सामाजिक किसिमका संस्कृति प्रथा।।
दिए नेपालीका मन खुस हुने काव्य लहरी ।
रहून् हाम्रा मोती अति चहकिला भानु जसरी।। -६

०००
बट्टार, नुवाकोट । हाल: बालाजु,काठमाडौँ ।