नेपाली हास्यव्यङ्ग्य अनलाइन पत्रिका

वसन्त सापकाेटा :

स्वार्थी नेताहरू भाषण गर्छन्
यो देशमा चौतर्फी विकासको लहर फैलिदै छ
भाडाका विद्वान्हरू अर्थ्याउँछन्
नेपाल अब चाँडै नै स्वर्ग बन्दै छ
किनिएका पत्रकारहरू छाप्छन्
यो देश अब नेताको सबल नेतृत्वमा अगाडि बढ्दै छ
तर जनता अनुभव गर्छन्
यो देश दिन-प्रतिदिन विस्तारैबिस्तारै धरातलमा भासिँदै छ ।।

अनुबन्धित अर्थशास्त्रीहरू ओकल्छन्
नेपालीको आम्दानी औसत १५ प्रतिशतले बढिसक्यो
मुठ्ठीभित्रका तथ्याङ्कविहरू भट्याउँछन्
महंगी अब २० प्रतिशतले घटिसक्यो
खल्तीभित्रका प्रवक्ताहरू वक्तव्य निकाल्छन्
भोक, रोग र अशिक्षा अब नेपालबाट हटिसक्यो
तर जनता अनुभव गर्छन्
नेपालीको स्वरूप नै विकृतिमा बिक्न लागिसक्यो
सरकार कुर्लन्छ
यहाँ शान्ति सुव्यवस्थाको व्यवस्था राम्रो छ भनेर
घरमा बुहारी रुँदै फर्किन्छिन्
दिउँसै मध्याह्नमा मेरो सिक्री लुटियो भनेर
अपराधीहरू चिल्ला कारमा गुड्छन्
ठूलो ओहदाको मखुन्डो लगाएर
जनताहरू दिउँसै ढोका थुनेर घरमा बस्छन्
‘त्राहिमां प्रभु रक्षा गर’ भनेर ॥

गोष्ठी र सेमिनार फलाक्छ
देशको प्राचीन कला र संस्कृतिको रक्षा गरौं भनेर
मन्दिरको पुजारी रुँदै बिन्ती गर्छ
हजुर ! मूर्ति त हिजै राति चोरिएछ भनेर
नगरपतिहरू आकाशमा उड्दै कल्पना गर्छन्
काठमाडौं स्वच्छ र हराभरा बन्दै छ भनेर
तर जनता अनुभव गर्छन्
दिनदिनै यो काठमाडौं
फोहर फाल्ने यौटा सिङ्गो कन्टेनर बन्दै छ भनेर ॥

०००
नाङ्गाे नाक (२०६०)