नेपाली हास्यव्यङ्ग्य अनलाइन पत्रिका

वसन्त सापकोटा :

थरीथरीका नाम छन् मेरा, थरीथरीका काम
पाल्दा तिम्लाई घाटा छैन, फाल्दा पर्छ दाम
छुसे नाथे खैरे जैरे, स्थानमुताबिक नाम
प्याराे गरेर राख पाल, खोस्दिन तिम्रो माम ।

रौँ बराबर फरक परेमा, दुर्घटनामा बाँच्छौ
राैँ बराबर यताउतिमा, मृत्यु-मुखमा पुग्छौ
राैँबिना यो धरतीतलमा, तिम्रो सम्भव छैन
रौँबिनाको तिम्रो तालु, हर्छ सबै सुख चैन ।

औरङ्गजेबको दाही बनेर, नाम खुब चलाएँ
हिटलरको त्यो जुंगा बनेर नाम अमर गराएँ
कपाल बन्दै साई बाबालाई खुब चिनाएँ
रौँकै खातिर विश्वभरिमा हजाम पैदा गराएँ ।

सुरुसुरुमा भुवा बन्छु, अनि पछि म भुत्ला
स्थान अवस्था हेरी बिचारी, बन्छु म अनि चुल्ठा
कुनै ठाउँमा कालो बन्छु, कुनै ठाउँमा खैरो
कतैकतै म कैलो हुन्छु कतैकतै म जर्रो ।

जन्म हुँदा म कैलो बन्छु अनि पछि म खैरो
पूर्ण जवानी कालो हुन्छु, वृद्ध भएपछि सेतो
रिस उठेमा जर्रो बन्छु, कैले बन्छु ठाडो
खुसी भएमा सललल बग्छु, बन्छु सबैको प्यारो ।

च्यापे मलाई चेप्टो बन्छु, अनि म बन्छु झुम्रे
कहीं लाजले भुतुक्क बन्दै बन्छु घुम्रे-घुम्रे ।
थरीथरीका नाम छन् मेरा, थरीथरीका काम
पाल्दा तिम्लाई घाटा छैन, फाल्दा पर्छ दाम ।

०००
माणिकरत्न शाक्यकाे खाेजीपाँसुलीमा नाङ्गो नाक सङ्ग्रहबाट