नेपाली हास्यव्यङ्ग्य अनलाइन पत्रिका

आर. आर. चौलागाईं :

उसलाई कतै पनि घुम्न दिनु हुँदैन
नत्र हाम्रो गणतन्त्र धरापमा पर्छ ।
ऊ आज जुम्लामा छ
भोलि झापा जाला
पर्सि दार्चुला पुग्ला
निपर्सि हिमाल, पहाड र तराईतिर ढिम्केला
अनि हामीले हात बाँधेर कसरी टुलुटुलु हेर्नु !
उसलाई कतै पनि फोटो खिच्न दिनु हुँदैन
नत्र हाम्रो गणतन्त्र धरापमा पर्छ ।
उसले त्यहाँ मीठो बोल्ला
महिलाहरूलाई नजिस्क्याउला
चन्दा नउठाउला
भट्टीमा जाँडरक्सी नखाला
मान्छेहरूलाई नपिट्ला/नमार्ला
टिलपिल टिलपिल भएर सडकमा नसुत्ला
अनि हामीलाई अप्ठेरो पर्दैन ?
उसलाई कतै पनि भिडिओ बनाउन दिनु हुँदैन
नत्र हाम्रो गणतन्त्र धरापमा पर्छ ।
तपाईँहरूलाई थाहै छ नि !
ऊ गणतन्त्र विरोधी हो
उसको हरेक क्रियाकलापले गणतन्त्र कमजोर हुँदै जान्छ
गणतन्त्रप्रतिको विकर्षण बढ्दै जान्छ
गणतन्त्रलाई बाईबाई हुँदै जान्छ
अनि हाम्रो कुर्सीलाई खतरा हुँदैन ?
उसलाई कतै पनि कोहीसँग भेट्न दिनु हुँदैन
नत्र हाम्रो गणतन्त्र धरापमा पर्छ ।

०००
हृटाैँडा
२०८२ साउन १९