नेपाली हास्यव्यङ्ग्य अनलाइन पत्रिका

अर्जुन दाहाल (क) :

नेपाल देशको विकास र प्रगतिको मूल आधार राजनीतिक दलहरू नै हुन् । जति धेरै पार्टी, उति धेरै नेता। जति धेरै नेता, उति धेरै कार्यकर्ता । उति धेरै कर्याकर्ता झन् धेरै योजना। अनि त, विकास पनि त्यत्तिकै छरपस्ट छ।

पुराना पार्टीका चिन्हहरू— रूख, घाम, गाई, हलो, हँसिया–हथौडा आदि थाहा भएकै हो । मझौला पार्टीका चुनाव चिन्हहरु: गोरुगाडाको चक्का, गिलास, बायाँ आँखा, इनार, मादल, बस, चिठ्ठा बोकेको परेवा. बुट्टे सारी,  यी सबैले नेपालको लोकतन्त्रलाई झनै व्यापक र रंगीन बनाएका छन् ।

अहिले बजारमा चर्चामा रहेका अति नयाँ पार्टीहरू पनि छन्, जसले चुनाव जितेर “दुई तिहाई” ल्याउने दाबी गरेका छन् । यिनीहरूको चुनाव चिन्हहरू झनै सिर्जनात्मक छन्:

बालेन पार्टी – चुनाव चिन्ह: डोजर
दुर्गा पार्टी – चिन्ह: बैंकबाट लोन लिंदै गरेको मान्छे
हर्क पार्टी – चिन्ह: फेसबुक लोगो
कुलमान पार्टी – चिन्ह: बलिरहेको बिजुली
भीम रावल पार्टी – चिन्ह: डिल मुनि हाम फाल्दै गरेको मानिस
जनार्दन पार्टी – चिन्ह: मुसोले तार काटेको क्यामेरा
विद्या पार्टी – चिन्ह: अस्ताएको सूर्य

यी सबै पार्टीहरू आ–आफ्नै नामबाट दर्ता भएका छन्, र यिनले दुई तिहाई ल्याएर देशलाई रामराज्य बनाउने दाबी गरेका छन् ।

देशमा जति पार्टी, उति मत, उति उत्साह थपिएको छ । अन्त्यमा, आजको “आधा सत्य, आधा भ्रम” मा अन्य थुप्रै नयाँ पार्टीका चमत्कारिक काम बारे लेख्न छुटाएकोमा नुन चिनी पानी क्षमाप्रार्थी छ।

०००
व्यङ्ग्य लेखक नुन चिनी पानी अमेरिकाका परिकल्पनाकार हुन्।