नेपाली हास्यव्यङ्ग्य अनलाइन पत्रिका

विनोदविक्रम के.सी. :

मसँग घरको न घाटको
सार्वभौम सत्ताधारी छ
फुर्सदमा पनि बेफुर्सद रहने
बाह्रैमासको बेरोजगारी छ
तिमीसँग के छ ?

मसँग रामहरुले खडा गरेका
हराम लोक छ
निमुखालाई उठ्‌नै नदिने
मनुस्मृतिको श्लोक छ
तिमीसँग के छ ?

मसँग हिउँद काट्न
तुषारोको राप छ
त्यतिले नपुगे
काठमाडौंको रवाफ छ
तिमीसँग के छ ?

मसँग देशभक्तको
काटिएको गलो छ
तिनै गलाहरुबीच अवस्थित
इतिहासको थलो छ
तिमीसँग के छ ?

के छ तिमीसँग ?
जो हतियारको रुपमा प्रयोग हुनसक्छ
भोक ? गरिबी ? हीनताबोध ?
एड्स ? सिफिलिस् ? प्रेम कविता ?
आत्महत्याको लम्बेतान योजना ?
जाँडे विद्रोह ?
चिया पसलमा गफ चुटेर
यो देशको मुहार फेर्ने नायकी ?
के छ हौ तिमीसँग ?

मैले जान्नु जरुरी छ
तिमीसँग मेरो वर्गीय/जातीय एकता
सम्भव छ कि छैन ?

एकता सम्भव भयो भने
हामी दुई मिलेर
क्रान्तिको कारखाना खोलौंला
म हाकिम/तिमी पाले
ओ.के. ?

त्यसैले विस्तारै भन/विस्तारमा भन
तिमीसँग के छ ?

०००
चाल्नाखेल, काठमाडौँ