नेपाली हास्यव्यङ्ग्य अनलाइन पत्रिका

कृष्णप्रसाद पौडेल `जस्ताघरे´:

कच्चा सोचविचारले मनुजमा, सुद्धी कहाँ खुल्छ र ?
मान्छे मत्त भई उदात्त सपना, देखेर के हुन्छ र ?
राम्रा मौलिक योजना पर भए, निर्माण के हुन्छ र ?
साँच्चै पौरख गर्न खट्न नसके, आभा उसै मिल्छ र ? -१

भित्री सोच खराब भ्रष्ट छ भने,चेप्रो घसी हुन्छ के ?
मान्छेको व्यवहार शून्य छ भने, सिद्धान्तले गर्छ के ?
राखी चक्कु पकेटमा अधमले गीता पढी हुन्छ के ?
कालो कर्तुतले चल्यो यदि भने, माला जपी हुन्छ के ?-२

व्यर्थैको परिलक्ष्यहीन पथको, यात्रा गरी अर्थ के ?
टुङ्गोसम्म पुगेर जित्न नसके, दौडेर त्यो हुन्छ के ?
बेकम्मा रसहीन लेख रचना, लेखेर त्यो हुन्छ के ?
सुन्नेका दिल कर्ण तृप्त नहुने, बाचेर पो हुन्छ के ?-३

शिक्षा लिन्छु भनी बरालिन गए, दीक्षा उसै मिल्छ र ?
मान्छेका मिहिनेतका शिखर छन् , डाहा गरी हुन्छ र ?
अर्काले गतिलो भनोस् कि नभन‍ोस्, आफैँ ठुलो हुन्छ को ?
उम्दा यान रकेट हाँक्न नसके, आकाशमा उड्छ को ? -४

माटो चन्दनझैँ छ देश शिरझैँ, भन्दै धरा पुज्छ को ?
किल्ला यो बलभद्रको अमरको, ठान्दै कला सिक्छ को ?
पुर्खाका बल बुद्धि त्याग तपका पुज्ने यहाँ को छ र ?
मेरो देश सुवीरका सगर हो, भन्ने यहाँ को छ र ? -५

हाम्रा सन्ततिजत्ति बाहिर गए, र‍ोक्ने यहाँ को छ र ?
बारीखेत कुँडार बाँझिन पुगे, खन्ने यहाँ को छ र ?
पाका मानिस मात्र छन् घरघरै, पाल्ने यहाँ को छ र ?
चौतारो पनि रुन्छ आज भयले, रुङ्ने यहाँ को छ र ?-६

०००
वि.न.पा.-४, बट्टार,नुवाकोट ।