नेपाली हास्यव्यङ्ग्य अनलाइन पत्रिका

घनश्याम रेग्मी :

सामना गर्न छाडेर भाग्छन् काँतर पामर
दुलामा लुक्दछन् सर्प उज्यालाको भए डर ।

ढुङ्गे युग थियो राम्रो बास ओडारमा थियो
त्यतै फर्किन पाएमा मजाले बाँचिने थियो ।

कुराकानी थिए बाँकी आफन्त बन्धुवर्गमा
पढिन्थे कविता काव्य लेखिन्थे कति सर्गमा ।

समाचार कहाँ के छन् बुझ्नु खै कसरी अब
परेवा अब एकेक व्यवस्था गर केशव ।

अल्छी छन् जनता ज्यादै गर्दैनन् काम यी कुनै
ग्यास चुलो जलेको छ बाल्दछन् बिजुली झनै ।

काट त्यो बिजुली बत्ती गाडी मोटर रोक यी
जसले चड्न चाहन्छन् समात अनि ठोक ती ।

कुटानी र पिसानीका धन्दा आफैँ गरे भयो
यस्ता यी मिलले गर्दा धेरैको ज्यान पो गयो ।

दियालो बाल सल्लाको दाउरा वनको भर
आत्मनिर्भर लौ होऊ चाहे जे जसरी गर ।

पेटमा पटुका बाँध झोला एकेक चाहियो
बोक पम्प्लेट पार्टीका साथमा राख काँगियो ।

राख तस्बिर नेताका ढोग साँझ बिहानमा
जय नेता पुजौँ पार्टी देश जाओस् मसानमा ।

०००
नारायणपुर, विकास चोक ५, चितवन