नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

झर्ना ताल नदी वनस्पति अहा ! भन्ज्याङ अग्ला गिरि ।
झन् अग्ला हिमश्रृङ्खला वनचरी नाच्छन् सयौँ कस्तुरी ।।
घोड्ताप्रे अमला शिलाजित बुटी हर्राे र बर्रो फल ।
नानीझार सुुठो र सिस्नुु जमरा हुन् ओखती कम्बल ।।
१

शालिग्राम शिला तिलादि गुनिला, बेलीचमेली जुही ।
यार्सा याक उवा र फापर करू,चौँरी चरेका चुली ।।
अम्बा ओखर पारिजात निउरो,दुुर्वा र पन्ना हिरा ।
खोजीमा नित पार्थ झैँ अघि बढोस् सद्धर्म हो एकता ।।
२

सङ्ला दृष्टि लिएर कर्मपथमा, आराम बिर्सी बढे ।
नीचा दन्तबझान जर्जरपना निन्दा जुुगुप्सा सडे ।।
पक्कै शान्त र दान्त हुन्छ मुलुुकै समृद्धिले हल्चल ।
हुन्छन् शैल मधेस भोट सजिलै समृद्धिले मङ्गल ।।
३

वादैवाद नदीसमान बहँदै पुुग्छन् महासागर ।
पारावार छ ‘राष्ट्रवाद’ गहिरो भेटिन्छ रत्नाकर ।।
चोखा कञ्चन सोचमा अघि हिँडे समृद्ध नेपाल छ ।
दर्पै दर्प अहं घरैघर चढे नेपाल बर्बाद छ ।।
४

माटोमा ममता सिँचेर समता राखौँ धरा उर्वरा ।
हेर्दै शान्त सुशील पौरखथला नेपालको सभ्यता ।।
नौला सीप सजाउँदै प्रविधिले सम्पन बन्छिन् धरा ।
फुस्सा भाषण दम्भ ढाँट छलका वाग्जाल मासौँ सदा ।।
५

०००
धादिङ