नेपाली हास्यव्यङ्ग्य अनलाइन पत्रिका

मिलन समीर :

१) कसिङ्गर

किनेर नयाँ कुचो
राम्रोसँग बढारेर फाल्नैपर्ने
भइसकेको थियोे-
केही पुराना कसिङ्गरहरुलाई
जो, ढिलै भए तापनि
हावाको एक झोँकासँगै
पुरै बढारिएका छन्
सधैं- सधैंका लागि…
र सियो नै हराए पनि
सजिलै भेटिने भएको छ-
यतिबेला यो देशको आँगन !

२) पिलो

कुठाउँमा निस्किएर
वर्षौंदेखि धुरुक्कै रुवाइरहेको
एउटा बूढो कुहिगन्धे पिलो
गिर्खोसहित निचोरिएर
पुरै सकिएको छ- भर्खरै !

कामना गरौँ,
यस्तो कुहिगन्धे पिलो
जहाँबाट जसरी आएको थियोे,
त्यतैतिर त्यसरी नै जाओस्
अब फेरि फर्केर कहिल्यै नआओस् !

०००
करादीखोला, स्याङ्जा