नेपाली हास्यव्यङ्ग्य अनलाइन पत्रिका

भाेजराज रेग्मी मुखाले :

डाडूपन्यू चलाउने अघोरी नै रैछ, धन्य होस् भौमान् !
देश दुब्लाउने दैत्य मोटाउने घुसखोरी नै रैछ, धन्य होस् भौमान् !

बेबीसावरमा भुँडी देखाउँदै खुबै गिज्याउँथी मलाई
देउरानीकी पनि त छोरी नै भैछ, धन्य होस् भौमान !

लोग्नेमान्छे र बोकाको गन्धले गाउँ- शहरै पिटेको छ
खसी पार्ने कानूनको कमजोरी नै रैछ, धन्य होस् भौमान् !

अरूलाई उत्ताउली, नक्कली भनेर बदनाम गर्थी ऊ
सुकुलगुन्डासँग पोइल त्यै मोरी नै गैछ, धन्य होस् भौमान !

अम्रिकाबाट आको, उपहार पाको भन्दै गफ लडाउँथ्यो मूला
कुरो बुझ्दा त आखिर चोरी नै रैछ, धन्य होस् भौमान् !

०००
सिनामङ्गल, काठमाडाैं