नेपाली हास्यव्यङ्ग्य अनलाइन पत्रिका

मिलन समीर :

हाम्रै हातमा यतिबेला
खुकुरी छ चमचमाउँदो !

चिलाइरहेको छ यतिबेलै
हाम्रो दाहिने हात
चिलाइरहेको हुनुपर्छ यतिबेलै
सायद तिम्रो गर्धन पनि… !

फर्फराइरहेको हुनुपर्छ देब्रे आँखा
र त जे देखिरहेका छौ हामीलाई
त्यही नै बोलिरहेका छौ हाम्रो बारेमा
पाइलैपिच्छे खोलिरहेका छौ हाम्रो पोल
आगोले झैँ पोलिरहेका छौ हामीलाई ।

जस्तो देखिरहेका छौ हामीलाई
त्यस्तै लेखिरहेका छौ हाम्रो बारेमा !

खोजिरहेका छौ निहुँ हामीसँग
रोजिरहेका छौ अफ्ठ्यारो बाटो !

जुनसुकै बेला पनि
पारिन सक्छौ तिमी
सबैभन्दा अफ्ठ्यारोमा
मारिन सक्छौ तिमी
कुनै पनि बेला… !

बुझाएरै बसे हुन्छ ढुक्कैसँग
बाँकी लेनदेनको हरहिसाब !

दुनियाँले
जङ्गलीराजको दु:शासनलाई
रोजेरै पठाइसकेको अवस्थामा
अझैसम्म पनि
कानुनीराजको
कुशासनको खोजी गर्ने
कलियुगे कृष्ण ! तिमी
जुनसुकै बेला पनि
पारिन सक्छौ
जिन्दगीकै अफ्ठ्यारोमा !

गुमनाम गराउनकै लागि
खोसिदिएर आधारभूत परिचय
पुर्‍याएर पहिचानविहीन अवस्थामा
घिसारिएरै झारिन सक्छौ
आत्मसम्मानको आधारशिविरबाट
आत्मदाहको निर्जन बगरमा !

तारिन सक्छौ
हेलिदिएर जीवनसागर
सारिन सक्छौ
परलोकतिर बसाइँ
मारिन सक्छौ
खरानी वङ्शमा जन्मिएका
महाराज कंसकै हातबाट
कुनै पनि बेला… !

कृष्णको हातबाट कंस मारिने
द्वापर युग होइन यो
कंसको हातबाटै कृष्ण मारिनसक्ने
कलियुगको कालबेला हो यो !

सम्बन्धित सबैलाई समयमै चेतना भया !

०००
करादीखोला, स्याङ्जा ।