नेपाली हास्यव्यङ्ग्य अनलाइन पत्रिका

इ. कुमार खड्का :

भूकम्पिय क्षत विक्षतले
भगौडा भएको छ ऊ,
अग्नि दहनबाट उम्कदै
भाग्यले जिउँदो रहेको छ ऊ,
फेरि हुने अनिष्टलाई
नजर अन्दाज गर्दैछ अझै,
सोचौं ! अविवेकले गाँजेको छ
स्याललाई दशा लागेको छ ।

बेकुफी सोचले,
घाटमा छरपस्ट भएको
वास्तविकताको विगत विचार्दैन,
वर्तमान समस्याको खात
र, समाजको पीडा व्यहोर्दैन,
लाभको निर्लिप्तिमा
हिरा फोर्न खोज्नेले,
समाजको निम्ति
तीलको दाना सोर्दैन ।

लाग्छ,
हुस्सु र कुहिरोमा कागहरु
गन्तव्यकै दिशाहीनतामा छन्,
तथापि कौवाको चुचो टोक्नेहरु
चीलको पिठ्युँ चढ्नै तल्लिन छन् ।
नियती र भाग्यको कुरा हुन्छ
तर्क र बुद्धिले हारेपछि,
खुल्दो रहेनछ बेहोशी चेत,
विवेक बन्धकमा परेपछि…!

०००
आलापोट, काठमाण्डौं ।
२०८२/०७/२९