नेपाली हास्यव्यङ्ग्य अनलाइन पत्रिका

लक्ष्मण नेवटिया :

फाल्गुणको चुनाव सकेर
फर्कनु ठानेर जाति।
भारत लागेका नेपालै फर्किए
आसामे पन्द्र हात्ती।
अखबारभरि समाचार यो
छापियो छ्याप्छ्याप्ती
दिनमै तारा देखाइदिने यिनी
कस्ता छन् उत्पाती।
कतिलाई त लगाइसके
कडा साढेसाती।
पुर्‍याए छन् कतिलाई त
म्यादै नपुगी माथि।
भत्काएर किसानका घर
खुशी मातीमाती।
कतै सके हजूरबालाई
कतै सक्याए नाति।
हामीले पाहुना ठानेका थियौं
निस्केछन् खुरापाती।
गणेश मानेर पूजा गर्‍यौं
गुनासा राखेर थाती।
तर विध्वंश गरिरहन्छन्
के दिन के राति।
बोट बिरुवा सबै उखेले
केरा-के नासपाती।
बिताउन सम्म बितायो !
हरे ! कस्तो यो
फिरन्ते हात्तीको जाति।

०००
विराटनगर