नेपाली हास्यव्यङ्ग्य अनलाइन पत्रिका

हरिप्रसाद घिमिरे :

व्यथा सुन्नुपर्ने छ भोकाहरूको
कथा सुन्नु पर्ने छ धोकाहरूको
समस्या लुकेको छ पोकाहरूको
यहाँ दाइँ चल्दै छ बोकाहरूको।।१ ।।

कतै लाउडाको गिरीबन्धु अर्को
कतै सत्तरी ती करोडौँ छ लर्को
खुसी पर्न पर्ने छ धोकाहरूको
यहाँ दाइँ चल्दै छ बोकाहरूको।।२ ।।

यहाँ उद्यमी खै थला पर्न थाले
विकासे कुरा झन् ठुला गर्न थाले
ठुलो चाङ लागेछ धोकाहरूको
यहाँ दाइँ चल्दैछ बोकाहरूको।।३ ।।

न हाँसेर कोशी सधैँ बग्न पायो
छ काली रुँदैलेक हाम्रो हरायो
न सुस्ता बचाए समस्या अरूको
यहाँ दाइ चल्दै छ बोकाहरूको।।४ ।।

थिए जङ्गली काठ बेचेर खाए
र उद्योग बेचेर नेता अघाए
कलाकार हाम्रा बने ती अरूको
यहाँ दाइँ चल्दैछ बोकाहरूको।।५ ।।

चिनीकारखाना र धागो उडाए
इँटा छैन त्यो कागजै छैन खाए
गयो टायरैको गुडाए अरूको
यहाँ दाइ चल्दै छ बोकाहरूको।।६ ।।

०००
आदेश्वर, नागार्जुन