नेपाली हास्यव्यङ्ग्य अनलाइन पत्रिका

लक्ष्मण नेवटिया :

समस्या देशको छ देशले बुझोस्
समाजको छ समाजले बुझोस्
उसको छ, यसको छ
जसको छ, उसले बुझोस्।
म मेरोमा छु मस्त
छिमेकी मस्त छ कि त्रस्त -मलाई के ?

म छुँ सम्पन्नताको छहारीमा
तिमी लाइन बसेका छौ
जान साउदी, बेरोजगारीमा
मलाई के ?

मसँग त छ
धनदौलतको थुप्रो
तिम्रो छैन एक घाँसको झुप्रो
मलाई के ?

तिमीले बगाउँदा पसिना
म हुन पुगें सम्पन्न,
तिमी त जन्मजात थियौ
रह्यौ अहिले पनि विपन्न- मलाई के ?

मेरा छोराछोरी पढ्दैछन् विदेशमा
कोटा सिफारिस पाएर विशेषमा
तिम्रा छोराछोरी स्कुल जान
पाएका छैनन् देशमा-मलाई के ?

जब सुनेर उसका कुरा
जोरले लगाएँ झापड
र चिच्याएँ – हत्केला छ मेरो
हान्छु वा सुमसुम्याउँछु
चुपलाग- तँलाई के ??

०००
विराटनगर