नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

उसले घर पोल्यो
र भन्यो
मैले क्रान्ति गरे।

त्यसले पुर्खाको विरासतमा बन्चरो हान्यो
र भन्यो
मैले क्रान्ति गरेँ।

अर्कोले नदीनाला बेचेर सत्तारोहण गर्यो
र भन्यो
मैले नयाँ युगको आरम्भ गरेँ।

फेरि अर्कोले आफूलाई
अकंट राजनेता घोषणा गर्यो
र भन्यो
मैले लोकतन्त्रको जग बजबुत बनाएँ।

त्यसैगरी अर्कोले मन्दिर भत्काएर
र भन्यो
मैले क्रान्तिमा अर्को इट्टा थपेँ ।

उसैगरी उसले पनि जनताको
आँसु र रगतको दहमा पौडी खेल्यो
र भन्यो
मैले शहीदको सपना पुरा गरेँ।

यसरी वर्षौदेखि
हामी नेपाली
नयाँ, नयाँ क्रान्तिको अनुभव गरी रहेका छौँ,
क्रान्ति नायकहरुको
जयगान गर्न अभ्यस्त भएका छौँ।

जय नेपाली क्रान्ति !

०००
गाेरखा