नेपाली हास्यव्यङ्ग्य अनलाइन पत्रिका

घनश्याम रेग्मी :

नाच चलेको पहिले
काम चलेको अहिले
नाटक गर्छन् जहिले
भोट खसाल्ने कहिले ।।१

गोठ बगे साउनमा
कष्ट सहे जीवनमा
ओत बनेनन् जनका
भोट फकिन्छन् उनका ।।२

आस जगाए मनमा
खास छु भन्दै जनमा
फूल र माला उरमा
भोट बटुल्ने सुरमा ।।३

गेह बनाए पुरमा
मस्त थिए ती कुरमा
फेरि बटुल्ने सुरमा
गाउँ छिरे यी टुरमा ।।४

नोट थमायो जसले
भोट कमायो उसले
अस्ति भएको जसरी
भोट लिने हुन् त्यसरी ।।५

के छ र चासो जनको
आखिर चासो धनको
नोट दिने छन् जुनले
भोट बटुल्छन् उनले ।।६

खेल चलेको रसिलो
आँत गराऊ कसिलो
कोट लगाऊ ससिलो
भोट कमाऊ सजिलो ।।७

आस छ पुग्ने पदमा
हिँड्नु छ सत्ता कदमा
साइत राम्रो अहिले
भोट दिए है सबले ।।८

०००
विकास चोक ५, भरतपुर, चितवन