नेपाली हास्यव्यङ्ग्य अनलाइन पत्रिका

लक्ष्मण नेवटिया :

म मतदाता
कहिले पोखरीको माछा जस्तो,
सबैले आआफ्नो बल्छीमा
आकर्षक आश्वासनको चारा उनेर
फसाइ रहेको।

कहिले पिंजडाको सुग्गा जस्तो,
हो, हो, सुग्गा जस्तो
सबैले आफ्नै जय जयको नारा,
रटाइ सिकाइ रहेको।

न यताको – न उताको
मौका पाउदै सबैले होच्याइ रहेको
घडीको पेण्डुलम जस्तो !
पुच्छर हल्लाइ रहेको।

कहिले मदारीको
बाँदर जस्तो
सबैले नचाइ रहेको !!

वाचा त पाउछु
असली माया पाइएन
कहिल्यै कसैको…

सहीछाप नभएको
बेरीतको “भर्पाइ” जस्तो
कस्तो कस्तो ??
सबैभन्दा सस्तो !!

कहिलै हुन नचाहदा पनि
भएको छु त्यस्तो…!!!
हालत दिनदिनै खस्दो…

बेलाइन स्थितिलाई
लाइनमा लाउन समय अघि
लाइनमा… बसेको !

हो-चोखो माया पर्खेर बसेको
– म मतदाता

०००
विराटनगर