नेपाली हास्यव्यङ्ग्य अनलाइन पत्रिका

नन्दलाल आचार्य :

​सचेत र सच्चा नेपाली मात्र एक भएर पुग्दैन
सयौँ वर्षका दरबारी र सरकारी एक होऔँ !
कोतपर्वका खुकुरी र सुस्ताका हलो एक होऔँ !
भ्रष्टका जालो र तस्करीका सालो एक होऔँ !
गिरीबन्धु, भुटानी र सहकारीका ठग एक होऔँ !
देश बेच्ने दलाल र सत्ताका मग एक होऔँ !
​नेताका झोले र अन्धभक्त मात्र एक भएर पुग्दैन
पसिना बेच्ने परदेशी र माटो खन्ने हली एक होऔँ !
भिजिट भिसा, वाइड बडी र सुनका चुरोट एक होऔँ !
ललिता निवास, टीकापुर र कालो कोट एक होऔँ !
ओम्नीको कमिसन र यतिको फेरो एक होऔँ !
एनसेलको अङ्गालो र ‘डडेका नोट’ सबै एक होऔँ !
​गुट र फुटका स्वार्थ मात्र एक भएर पुग्दैन
सत्य मार्ने कसाइ र झुटको गल्ली एक होऔँ !
भोक लागेका जनता र देशको यो खल्ली एक होऔँ !
कुर्सीको म्युजिकल चेयर र भागबन्डा एक होऔँ !
साँठगाँठको मध्यरात र भ्रष्टाचारको डण्डा एक होऔँ !
​बा-आमा र छोराछोरी मात्र एक भएर पुग्दैन
दाजु-भाउजू, भिनाजु र सालो एक होऔँ !
भोलिको सपना बेच्ने र आजको होस एक होऔँ !
प्रधानमन्त्री पालोपालो र कुशासनको जोस एक होऔँ !!

+++

​महेन्द्रपार्कका रुख र कौडीको सल्ला एक होऔँ !
धमिजा र लाउडाको पुरानो हल्ला एक होऔँ !
गिटी-बालुवा तस्कर र क्रसरका डन एक होऔँ !
भ्यू-टावर बनाउने र रित्तो तुल्याउने मन एक होऔँ !
​मेलम्चीको लेदो र ठेकेदारको आलटाल एक होऔँ !
छपन्न करोडको अङ्क र सेक्युरिटी प्रेसको जाल एक होऔँ !
भुटानी शरणार्थीको ‘फरम’ र नक्कली परिचय एक होऔँ !
गिरीबन्धुको जग्गा र ‘नियत’ को निश्चय एक होऔँ !
​बा-आमा र छोराछोरी मात्रै एक भएर पुग्दैन
पीए, ड्राइभर, भान्जे र सबै सालो एक होऔँ !
ललिता निवासको सरकारी जग्गा र मोही एक होऔँ !
कोरोनाको मास्क र स्यानिटाइजरको द्रोही एक होऔँ !
​सहकारीको बचत र सञ्चालकको विदेश सयर एक होऔँ !
जनताको आँसु र ठगहरूको नयाँ सहर एक होऔँ !
भिजिट भिसाको धन्दा र अध्यागमनको सेटिङ एक होऔँ !
वाइड बडीको इन्जिन र कमिसनको वेटिङ एक होऔँ !
​म्युजिकल चेयर रेस
अनि
प्रधानमन्त्री र राष्ट्रपति भाग लगाउने सर्तमा
पालोपालो हामी सबै अब एक होऔँ !!
+++

​शैक्षिक मरुभूमिकरण अब सबै एक होऔँ !
​विश्वविद्यालयको तालाबन्दी र दलीय सिफारिस एक होऔँ !
रजिस्ट्रारको कुर्सी र उपकुलपतिको “पोलिटिक्स” एक होऔँ !
कक्षाकोठामा राजनीति र जाँचमा ‘सेटिङ’ एक होऔँ !
डिग्रीको कागज र बेरोजगारको ‘वेटिङ’ एक होऔँ !
​निजी स्कूलको चर्को शुल्क र मध्यमवर्गीयको ऋण एक होऔँ !
सरकारी विद्यालयको जीर्ण गारो र रित्तो टिन एक होऔँ !
नक्कली शैक्षिक प्रमाणपत्र र ‘रातो’ मसी एक होऔँ !
कलिला सपना बेचेर विदेश पठाउने ‘कन्सलटेन्सी’ जति एक होऔँ !
​बा-आमा र छोराछोरी मात्रै एक भएर पुग्दैन
शिक्षक सङ्घ, सङ्गठन र नेताका ‘पालो’ एक होऔँ !
शिक्षाको व्यापारीकरण र ज्ञानको अनिकाल एक होऔँ !
प्राज्ञिक मर्यादा भत्काउने यो कुरुप काल एक होऔँ !
​भविष्यको गोरेटोमा-
राहदानी बोक्ने हात र डिग्री जलाउने चेत एक होऔँ !
शैक्षिक माफिया र बिचौलियाको एउटै खेत एक होऔँ !
म्युजिकल चेयर रेस
अनि
प्रधानमन्त्री पालोपालो एक होऊँ !!!
+++

​स्वास्थ्यको बजार सबै एक होऔँ !
​अस्पतालको बेड र बिरामीको चित्कार एक होऔँ !
औषधिको कमिसन र डाक्टरको ‘उपहार’ एक होऔँ !
निजी क्लिनिकको लुट र सरकारीको ‘हड्ताल’ एक होऔँ !
स्वास्थ्य बिमाको नाममा गरिबको बेहाल एक होऔँ !
​उपचार नपाएर मर्नुपर्ने “निमुखाको भाग्य” एक होऔँ !
सिटामोल नहुने पहाड र भ्यू-टावरको ‘राग्य’ एक होऔँ !
भेन्टिलेटरको व्यापार र अक्सिजनको हाहाकार एक होऔँ !
मिर्गौला बेच्ने दलाल र संवेदनहीन सरकार एक होऔँ !
​बा-आमा र छोराछोरी मात्रै एक भएर पुग्दैन
अस्पतालका साहु र माफियाका ‘पालो’ एक होऔँ !
स्वास्थ्यलाई कमाउने भाँडो बनाउने काल एक होऔँ !
लाचार प्रशासन र नीतिगत भ्रष्टाचारको ढाल एक होऔँ !
​भ्रष्टाचारी, भ्रष्टाचारी एक होऔँ !
म्युजिकल चेयर रेस
र
प्रधानमन्त्री पालोपालो एक होऔँ !!

०००
सिद्धार्थटोल, उदयपुर