नेपाली हास्यव्यङ्ग्य अनलाइन पत्रिका

लक्ष्मण नेवटिया :

चुनाव आउँदा हिमाल ओझेलमा पर्छ,
हिमालको चर्चा कहाँ कसले गर्छ ?
गरे पनि केवल सुनपानी छर्छ,
कसले यहाँ आई उसका पीडा हर्छ ?

डाक बढाबढ भइरहेका बेला,
हिमाललाई कसले स्याहार्छ ?
कारण, हिमालसँग साहस त छ,
तर भोट नगण्य छ !

न सडक चाहियो उसलाई,
न कुर्सी, न त सत्ता।
उसका आफ्ना सन्तति पनि,
खै, हराए कता ?

नेताका नारा तल बजारमा,
हिमालमाथि सुनसान छ।
किनकि भोट तलै खस्छ,
माथि त केवल पहिचान छ।

न अस्पताल पुगेको छ त्यहाँ,
न विद्यालयको उज्यालो।
उज्यालोको जो स्रोत छ,
फेरि किन त्यहाँ अँध्यारो ?

हिमाल सोच्छ मौन स्वरमा,
“म देश होइन र ?
मेरो पसिनाले बग्ने नदी
तिमीहरूको जीवन होइन र ?”

हिमाल चुप छ, त्यसैले कमजोर ठानिन्छ,
हो, उ नारा लगाउन जान्दैन।
मतपेटिकामा औँठाछाप छैन,
त्यसैले कसैले गन्दैन।

जब सीमा हडपिने चलखेल हुन्छ,
शिर ठाडो गरी उभिने हिमाल !
गीतमा भाका हालेर गाउँछौँ
“हिमाल सुन्दर, शान्त, विशाल।”

तर चुनाव आउँदा
किन हिमाल ओझेलमा पर्छ ?
एउटा यक्ष–प्रश्न,
खोइ उत्तर कुन “युधिष्ठिर” ले दिन्छ ??

०००
विराटनगर