नेपाली हास्यव्यङ्ग्य अनलाइन पत्रिका

घनश्याम रेग्मी

देशमा खेल चल्दैछ पासा छन् भिन्न रङ्गका
जुवाडे व्यस्त छन् थाप्न आआफ्ना दाउ ढङ्गका ।

ठालुले काम गर्दैनन्  निर्धो चापिन्छ मर्दछ
यो कस्तो मत्स्यको न्याय ठुलाले निल्नु पर्दछ ।

उद्योग देशमा छैनन् भएका पनि बेचिए
गाउँ बस्ती भए रित्ता त्यहाँका जन खेदिए ।

पानीका मूल बिस्तारै सुक्दै छन् गाउँमा किन
पानीमात्र कहाँ सुक्थ्यो बस्ती लाग्दैछ निख्रिन ।

हाम्रा पहाड रित्ता छन् हराए वन औसधि
पुराना रुख काटिन्छन् रोपिन्नन् यो छ दुर्गति ।

संभावना थियो राम्रो फलफूल जडीबुटी
राज्यको किन जाग्दैन यो कर्म गर्न हुट्हुटी ।

वस्तु पालनले हामी आत्मनिर्भर जो थियौँ
मलिला खेत हुन् हाम्रा बाँझै राखी खुसी भयौँ ।

पोलेर घर सम्पत्ति आगो बालेर ताप्दछौँ
अमूल्य रत्न बेचेर खरानी किन घस्दछौँ ।

खुट्टा तान्ने प्रवृत्तिको चाँडो अन्त्य गरौँ अब
देश निर्माण यात्रामा साथै साथै हिँडौँ सब ।

कहिले लाग्छ खै घाम भई आकाश निर्मल
बेलैमा बोट रोपेमा पाइनेछ मिठो फल ।

०००
समी चोक, भरतपुर ५, चितवन