नेपाली हास्यव्यङ्ग्य अनलाइन पत्रिका

लक्ष्मण नेवटिया :

धेरै बजाइयो घण्टी नवशक्तिको उदयमा,
अब बजोस् घण्टी विकासको लयमा।

आमाले पठाउन नपरोस् छोरालाई खाडी,
जनताको मतपत्र नबनोस् स्वार्थको हाँडी।
सुशासनको सुमार्गमा अब घण्टी बज्नुपर्छ,
हात्तीछाप चप्पलले नखोजोस् महँगो गाडी। १।

बज्यो घण्टी मन्दिरमा देउता फकाउन,
बज्यो घण्टी स्कुलमा पुस्तक समाउन।
बज्यो घण्टी रिक्सामा बाटो खोलाउन,
अब बजोस् घण्टी अन्यौल भगाउन। २।

मञ्चमा घण्टी बज्दा आकांक्षा ठूलै सज्यो,
हतास युवाको सपनामा ताली खूबै बज्यो।
सिनेमामा बजाइन्छ घण्टी, देखाइन्छ कथा,
अब यहाँ घण्टी बजाएर सकिनुपर्छ व्यथा। ३।

हलुवाइले अब एक्लै मिठाई नसिध्याओस्,
भोको नबसोस् जनता, हक आफ्नो पाओस्।
घण्टीको विश्वासमा आश ठूलै यहाँ जागेको,
गरिएका वाचा सबै लटरम्म झाँगी जाओस्। ४।

०००
विराटनगर