नेपाली हास्यव्यङ्ग्य अनलाइन पत्रिका

घनश्याम रेग्मी :

आत्मा जन्म इरानका मुलुकमा ठोक्रो यता भारत
भान्सामा छु हरेकका घरघरै सेवार्थ भर्नारत
वास्ता कत्ति थिएन आज सबले खोज्छौ मलाई किन ?
मौकामा चिज चिन्नुपर्छ जन हो चाँडै मलाई चिन ।

डल्ले शब्द हियाउँदै अघि भन्यौ भारी छ बोक्नै भन्यौ
मेरो तौल घटेर आज हलुको बन्दा उचाल्ने भयौ
खाँचो आज बुझेर भित्र घरमा थन्क्याउँछौ भन्दछु
लोभी छौ व्यवहार भाव मनको तिम्रो सबै जान्दछु ।

खाँचो छैन भने उता चहुरमा पल्टाउँछौ फाल्दछौ
जाडो घाम झरी र बादल हुरी सेकाउँदै ढाल्दछौ
मेरो मूल्य कहाँ बुझ्यौ र पहिले सोच्यौ कि एकैछिन ?
खाँचो आज परेर खोजबिनका नाता लगायौ किन ?

बन्दी जीवन बाँच्न बाध्य म भएँ खै घाम कस्तो हुने
मैले खुल्न हुँदै हुँदैन कहिल्यै के हाँस्नु के हो रुने
घेरा बन्धन छन् फलाम छ कडा उम्केर जाऊँ कता
बाटो बन्द भएर गुम्सिन पुगेँ खुल्दैन छानो यता ।

आफैँभित्र म राख्न सक्तछु कडा उत्सर्ज गर्ने चिज
यस्तो धारण गर्नु काम सजिलो हो हैन आफैँ बुझ
खाई हण्डर ताप राप सहँदै छाडेर जन्मस्थली
सेवा गर्न यता म हाजिर भएँ सर्वोच्च भूमण्डली ।

धर्तीको कुन गर्भमा कति बसेँ जन्मेँ कहाँ के थिएँ
मेरो जीवनमा कहाँ र कसरी घुम्दै म भौँतारिएँ
मेरा बन्धु र इष्टमित्र अब छन् कस्ता समस्याबिच
मेरो जीवनमार्गको अब कथा मान्छेहरू हो खिच ।

ए! मान्छे अनमोल रत्न बनिने इच्छा छ तिम्रो भने
केही खारिन सक्नुपर्छ तपमा जस्तो म आफू बनेँ
तिम्रा चिन्तन बाहिरी विषयका देखेर दङ्गै छु म
केही धैर्य गरी गुणी बन तिमी सन्देश यो दिन्छु म ।।

०००
विकास चोक , भरतपुर ५, चितवन