नेपाली हास्यव्यङ्ग्य अनलाइन पत्रिका

कविराज घिमिरे :

डोकाको जग नै भयो थङथिलो टुक्रेर बरियो
खेप्यो विघ्न सह्यो मऱ्यो छिनछिनै बौरेर छरियो
नेपाली मुटुमा बसोस् सकलमा फालेर धमिलो
आयो वर्ष नयाँ कुँदेर सपना चाखेर अमिलो ।। १

आँधीले उधिनी समस्त ननिको झाऱ्यो तलतिर
छाओस् उर्वरले यताउति घुमी कुद्दै परतिर
आँधी ठप्प बनी सुशान्त मतिको होस् साल गतिलो
आयो वर्ष नयाँ कुँदेर सपना चाखेर अमिलो ।। २

बढ्दा दम्भ कडा भऱ्याङ ठडियो आक्रोश चुलियो
सत्ताको मदले कठोर बनिदा निथ्रेर गुलियो
खल्लो स्वादविहीन भोजन हुँदा चाहेर चखिलो
आयो वर्ष नयाँ कुँदेर सपना चाखेर अमिलो ।। ३

पालेका दलका थिए जखमले ठेगान गुमिँदा
बेहोसीसरि छन् समाप्त अहिले उद्दण्ड सकिँदा
बोक्तै छन् सपना तथापि पर छन् को ठान्छ गुनिलो ?
आयो वर्ष नयाँ कुँदेर सपना चाखेर अमिलो ।। ४

आकाङ्क्षा चुलिए विकास तुहुँदा हाम्रा विगतमा
त्यस्तो वर्ष नहोस् नवीन अहिले बढ्दै स्वगतमा
हुन् कर्मादि नयाँ नयाँ अझ नयाँ नास्तै अब ढिलो
आयो वर्ष नयाँ कुँदेर सपना चाखेर अमिलो ।। ५

०००
भक्तपुर