नेपाली हास्यव्यङ्ग्य अनलाइन पत्रिका

पाषाण भिज्दा पनि हुन्छ साह्रो
आफन्त को हो पहिचान्न गाह्रो ।
व्यापार चल्ला नभएर क्रेता
भागी हिँडे बन्दछ को विजेता ?

तर्साउने कोसिस गर्छ आई
नाङ्लो ठटाई गजराजलाई ।
तिहार आउन्न दसैँ नआई
फलामले काट्छ फलामलाई ।।

आशा भरोसा छ सबै ढलेको
छ देश ‘विप्रेषण’ले चलेको ।
बाँकी चलाए अनुदानबाट
सत्ता कहाँ चल्छ इमानबाट ?

जो हुन्छ सत्ता सरकार पास
मौका मिले पार्दछ सत्यनाश ।
‘अहम्’ जुधी युद्ध ठुलो भएर
लङ्का डढाए ’हनुमान्’ गएर ।।

खाडी पुगेको छ युवा जमात
सन्तान रून्छन् नपुगेर भात ।
बच्चा ऋणी बन्दछ पेटबाट
के आश गर्ने र बजेटबाट ?

आफन्तले थाप्छ सधैकक धराप
सोझो बनी गर्दछ भित्र पाप ।
छर्केर गोमूत्र हुँदैन शुद्धि
‘विनाशकाले विपरीत बुद्धि ।।’

सुर्खेत