वासुदेव पाण्डेयगर्ने गरौँ आदर
जो दिन्छन् अभिभावकत्व ममता उत्प्रेरणा स्नेहिल जो हुन् रक्षक कृत्यबाट जसको भत्किन्न आस्था-डिल । बाँच्दासम्म बुबामुमा अघि सरी नि:स्वार्थ सेवा गर एकै वाक्य म भन्छु वृद्धजनको गर्ने गरौँ आदर ।।
वासुदेव पाण्डेय :
जन्माई यस लोकमा जुन ठुलो नि:शुल्क लाए गुन
आमाबा भगवान् र तीर्थ घर हो यो सत्य वाणी सुन ।
माया आसिक प्रेरणा बल तथा आजन्म दिन्छन् भर
एकै वाक्य म भन्छु वृद्ध जनको गर्ने गरौँ आदर ।।
खप्छन् धैर्य गरी अभाव अनिँदो वा भोक तिर्खा कति
आफू होइन भन्दछन् जुन ठुला मान्छे बनुन् सन्तति ।
राखी बन्धक चाहना घर सबै सोच्छन् र देख्छन् पर
एकै वाक्य म भन्छु वृद्ध जनको गर्ने गरौँ आदर ।।
आफ्नै सन्तति ठान्दछन् कति यहाँ यी बोझ वा भार हुन्
हाम्रा लागि अमूल्य रत्न जहिले झन् ज्ञान भण्डार हुन् ।
सोच्दैनन् कुभलो तथा अहित जो हुन् गेहका डाक्टर
एकै वाक्य म भन्छु वृद्ध जनको गर्ने गरौँ आदर ।।
आशीर्वाद अशेष मिल्छ जसका अर्ती ऋचातुल्य छन्
बन्छन् सार्थक चाडबाड जसले थप्छन् अलङ्कार झन् ।
भन्छन् जो नित मार्गदर्शक भई सत्कर्म मात्रै गर
एकै वाक्य म भन्छु वृद्ध जनको गर्ने गरौँ आदर ।।
जो दिन्छन् अभिभावकत्व ममता उत्प्रेरणा स्नेहिल
जो हुन् रक्षक कृत्यबाट जसको भत्किन्न आस्था-डिल ।
बाँच्दासम्म बुबामुमा अघि सरी नि:स्वार्थ सेवा गर
एकै वाक्य म भन्छु वृद्धजनको गर्ने गरौँ आदर ।।
०००
सुर्खेत
Subscribe
Login
0 Comments
Oldest
