नेपाली हास्यव्यङ्ग्य अनलाइन पत्रिका

एक
कछुवाले खुड्किलो चढ्नु पो त चढ्नु
चुनौतीलाई पार गर्दै बढ्नु पो त बढ्नु
कोरा किताब कण्ठस्थ पार्दैमा के हुन्छ ?
किताबले नै स्वयंलाई पढ्नु पो त पढ्नु ।

दुई
विचार कुहिएकाहरूसँग संगत गर्नु नपरोस्
कसैमाथि आश्वासन अनि भ्रम छर्नु नपरोस्
बाँदर बाठो हुँदा के च्यापिन्छ थाहा छ मलाई
गिरेर कसैको आँखाबाट तल झर्नु नपरोस् ।

तीन
दुखेको घाउमा खाडल खोप्नेहरूसँग सकिँदै सकिन्न
मित्रताको निहुँमा खील रोप्नेहरूसँग सकिँदै सकिन्न
जिन्दगी सखाप हुन सक्छ, एक सेकेन्ड होश गुम्दा
भेष बदलेर कठै ! मौका छोप्नेहरूसँग सकिँदै सकिन्न ।

काठमाडौं