नेपाली हास्यव्यङ्ग्य अनलाइन पत्रिका

१
आफ्नै विचार राम्रो मान्छन् राजनीतिकर्मीहरू
अर्कालाई खराब ठान्छन् राजनीतिकर्मीहरू
कालोलाई सेतो भन्न पर्छ भने यै हो सत्य
भनीकन कसम खान्छन् राजनीतिकर्मीहरू ।

२
घुस र कमिसनले बन्यो महल उहाँको
हेर्न लायक क्या छ चहल पहल उहाँको
हिजोसम्म गर्नु हुन्थ्यो चाकरी कतै
आज गर्छन् सेवक सेवा टहल उहाँको ।

३.
कसैलाई लडाएर मजा लिने गर्छन् कोही
कसैलाई उचालेर पीडा दिने गर्छन् कोही
विश्वासका हातहरू सबैतिर भेटिदैनन्
लुकि छिपि धोका दिई नदेखिने गर्छन् कोही ।

४
कर्तव्य पथबाट भाग्दै छौं हामी
उल्टा अभियानमा लाग्दै छौं हामी
गरिब छु भन्दै लाजै नमानी
सुनको थालीमा माग्दै छौं हामी ।

५.
नेताहरू आफ्ना–आफ्ना डम्फु बजाउँदै छन्
रहर लाग्दा बालुवाका महल ठड्याउँदै छन्
सहमतिका चिल्ला रोटी पकाए झैँ गरी
जनतालाई विवादका दोहोरी सुनाउँदै छन् ।

६.
कुरा पानीको गर्दै आगो सल्काउनेहरू छन्
भाषण सहमतिको गर्दै सत्ता पल्टाउनेहरू छन्
यो मुलुक सदियौँदेखि चलिरहेछ यसरी नै
यहाँ त सल्टिसकेका समस्या पुनः उल्टाउनेहरू छन् ।