नेपाली हास्यव्यङ्ग्य अनलाइन पत्रिका

१.
फोहोरमा हिड्नेहरू सांसद बनेका छन्
पैसाले मत किन्नेहरू सांसद बनेका छन्
जनतालाई फकाएर खुवाउँछु भन्दै
लोहोरो उसिन्नेहरू सांसद बनेका छन् ।

२.
बाग्मतीमा शुद्ध जल खोज्दै छौ तिमी
कायरभित्र आत्मबल खोज्दै छौ तिमी
बगाएर बगरमा पानी पसिनाको
लगानीको प्रतिफल खोज्दै छौ तिमी ।

३.
हाल्न आँखाहरूमा छारो मन पर्छ उहाँलाई
नरम रुचाउनु हुन्न सारो मन पर्छ उहाँलाई
हर्मम देखिनु हुन्छ उज्यालोको बध गर्न उत्सुक
जुनेली रातमा पनि अँध्यारो मन पर्छ उहाँलाई ।

४.
धार विनाको तरवार बेकार छ
विवेक विनाको विचार बेकार छ
हरेक कुराको आफ्नै आधार हुन्छ
शासन विनाको सुधार बेकार छ ।

५.
गहिरो नदीको प्रवाहमा जङ्घार खोज्दै छु म
खण्डहर जस्तो बूढो सहरमा जीणर्ोद्धार खोज्दै छु म
खोजी अलि भिन्न प्रकारको छ अचेल मेरो
बेइमानहरूको बस्तीमा इमान्दार खोज्दै छु म ।

६.
हरियालीको नारा दिँदै जङ्गल फाड्दै छौँ हामी
मेलमिलापको लक्ष्य लिँदै एकता भाँड्दै छौँ हामी
हावातालमा समृद्धिका कुरा भने खुब गर्छौं
गरिबलाई उठाउँ भन्दै गरिबी बाँड्दै छौँ हामी ।