नेपाली हास्यव्यङ्ग्य अनलाइन पत्रिका

एक दिन संसारमा यस्तो पनि दिन आउने छ
भोकमरी पर्नेछ मान्छेले मान्छे खाएर अघाउने छ ।

पृथिवीले गति फेर्ने छ घडी उल्टो घुम्नेछ
चन्द्रर सूर्य पश्चिमबाट उदाइ पूर्व अस्ताउने छ ।

प्रलय हुनेछ महाभारत शृङ्खला फेरि दोहोरिनेछ
जीवित कोही रहन्छ रहन्न सन्नाटा छाउने छ ।

पुराना ग्रन्थ पुराना संरचना ध्वस्त पारिने छ
नयाँ पुस्ताले छुट्टै नयाँ इतिहास लेखाउने छ ।

मान्छेको शक्ति देखेर भगवान् चकित भएर
जे जे भन्छ मान्छेले चुपचाप् सहमति जनाउने छ ।

भगवान्ले छोड्ने छ, भक्त गएर मन्दिर बस्ने छ
साँझ बिहान भगवान्ले भक्तको भजन गाउने छ ।

भावी डराउनेछ छैठीको दिन भाग्य निर्धारण गर्न
लेख्ने कलम मसी भावीले मान्छेलाई थमाउने छ ।

दुःख पिर शोकबाट मान्छेले मुक्ति पाउनेछ जब
चाहना अनुसार मान्छेले आफ्नो भाग्य खोपाउने छ ।

नीति फेरिनेछ संसारकै परिस्थिति बदलिनेछ
हरेक कार्यालयले मान्छे मान्छेलाई कर बुझाउने छ ।

बसेरी– ५, धादिङ