नेपाली हास्यव्यङ्ग्य अनलाइन पत्रिका

बढेमानको पेट लिएर
अट्टाहास हुन पनि नसकेको
भुँडी पनि गज्जबकै रहेछ बा !
हिउँदमा सडक किनारभरी फोहोर कुहिन सक्ने,
वर्षातमा सडकभरी खाडलमा पानी भरिन सक्ने ।
गर्मीको त के कुरा गरौँ हजुर
धुँवा धुलोले धपक्कै काठमाण्डु !
खाँट्टी कुरो त अझै छ,
देशभरिका युवाको भाग्य जोख्छ काठमाण्डु
बेरोजगार युवाहरूको भाग्य लेख्छ काठमाण्डु !
पर्खिनुस् है !
पर्खिनुस् ! अझै बाकी छ खाटी कुरा त–
सबै यन्त्र तन्त्र र संयन्त्र प्रयोग हुन्छ काठमाण्डुमा,
गरिबीमा पिल्सिएको हर्के दाइ रुन्छ काठमाण्डुमा ।
भ्रष्टचारी नेताहरू आफ्नो छवि धुन्छ काठमाण्डुमा,
दुराचारी र व्यभिचारी गगन छुन्छ काठमाण्डुमा ।
यति मात्र कहाँ हो र सान्दाइ !
रोग भोक सोक लुकाउने प्यारो काठमाण्डु,
दुखीको त्यो मन दुखाउने प्यारो काठमाण्डु ।
जनताको रगत सुकाउने प्यारो काठमाण्डु,
नेपालीको शिर झुकाउने प्यारो काठमाण्डु ।
हेर न ! सान्दाइ !
नेताहरूको हुन्छ अड्डा
देशभरि लुटेको धन रासी !
दिनहुँ गर्छन भागबण्डा ।
उपचार गर्न पनि,
उठाउँछन देशको झण्डा ।
गरिब जनता सडकमा,
पुलिस लगाउँछ डण्डा ।
लु यही छ है सान्दाइ हाम्रो अवस्था !
केही दिन पछि तल्ला घरे मुखिया बा आउँदै छन्,
नेताहरू अहिलैदेखि आ–आफ्ना चम्चा लाउँदै छन् ।
मेरो घरमा कृपा गरियोस् प्रभु भन्दै धाउँदै छन् ।
थुइइया ! यस्ताले पो नेपाल र नेपाली दाउँदै छन् ।
हाउ सान्दाई अझै कुरा अर्को भेटमा गरुला है त ।

झापा