नेपाली हास्यव्यङ्ग्य अनलाइन पत्रिका

एकचोटी सत्ता चाख्नै पर्यो
कुर्सीको स्वाद बुझ्नै पर्यो
जे जे पर्छ सबै टर्छ
एकफेर प्रयास गर्नै पर्यो
प्रजातन्त्र भाँडमा जाओस्
बाउको बिँडो त थाम्नै पर्यो ।

जनताको दुःख जनतै भोग्छन्
अभिनन्दन थाप्नै पर्यो
भोकोनाङ्गो को होला र ?
आफ्नो बजेट थप्नै पर्यो
प्रजातन्त्र भाँडमा जाओस्
बाउको बिँडो थाम्नै पर्यो ।

चाकडी गर्ने महान् हुन्छन्
दुईचार पदक दिनै पर्यो
नयाँ शासन सम्हाल्नु छ
भारदारहरू पाल्नै पर्यो
आफ्ना विरोधी सर्वनाश हुन्
पशुपतिनाथ भाक्नै पर्यो
प्रजातन्त्र भाँडमा जाओस्
बाउको बिँडो थाम्नै पर्यो ।

प्रजातन्त्र स्वतन्त्रता
मन्त्र बनाई जप्नै पर्यो
आफूले गर्ने गरिरहूँ
बिदेशी सामु फलाक्नै पर्यो
भोलि उतै भाग्नुपर्ला
चाकडी पनि गर्नै पर्यो
आफ्नो भविष्य कसले हेर्छ ?
टन्न जम्मा गर्ने पर्यो
देश बरु भाँडमा जाओस्,
बाउको बिँडो थाम्नै पर्यो ।