नेपाली हास्यव्यङ्ग्य अनलाइन पत्रिका

खुला आकाश र मुक्त देशका मान्छेहरू,
आफूलाई कति बन्दी सम्झिन्छन्,
अनि बन्दी भएको आफूलाई महसुस भएपछि,
कति आत्माभिमानका साथ बिद्रोह र क्रान्तिका कुरा गर्छन् !
बश ! यिनीहरूलाई क्रान्ति चाहिएको होला !!
आफूलाई,
आफैले,
मानसिक रूपले कैदी र बन्दी बनाएपछि,
या कैदी र बन्दी भएको महसुस गर्न शुरु गरेपछि
बिद्रोह त गर्ने पर्छ !
आफैले रचेर सृजना गरेको बन्धनभित्रको जिन्दगीबाट
आफैले आफैसँग
स्वतन्त्रताको लागि क्रान्ति र बिद्रोह गर्ने पर्छ !
मुक्ति र मुक्त संसारको खोजी त अब
नितान्तको विषयबस्तु भै आवश्यकता भन्दा माथि उर्लेर जान्छ !

खुल्ला आकाशमा स्वतन्त्र तरिकाले उडिरहेको पन्छीले,
आफूलाई म किन यो पिंजडामा जीवन बिताउने हो भनेर कुरा गर्दा,
त्यो पन्छीको वा सुन्नेहरूलाई
या अप्ठ्यारो वा समस्या !
कति उन्मुक्त भएर
आफू अनि अरु सबै कैदी भएको कुरा गर्दै
सबलाई मुक्ति दिने सपना देखाउछन् !
सपना बाँड्छन्
सपना बेच्छन्,
कति उन्मुक्तका साथ !

खुल्ला आकाश र मुक्त संसारमा बाँचिरहेका मान्छेहरू
अझै पनि,
अनवरत,
मुक्ति र खुल्ला आकाशको खोजी गर्दै,
अलास,
आफ्नै र लाखौँहरूका जिन्दगीहरूलाई
सिसिफसको अस्तित्वमा रुपान्तर गरिरहेका छन्
मुक्ति र स्वतन्त्रताको,
सपना बाँड्दै, सपना बेच्दै
यो खुल्ला आकाश र मुक्त संसारमा बाँचिरहेका मान्छेहरू !

वर्गेन, नर्वे