नेपाली हास्यव्यङ्ग्य अनलाइन पत्रिका

केहि फरक पर्दैन हामीलाई
शासकले श्रीपेच लाउन्
कि टोपीमा आउन्
हामी त केवल रैती न हौँ
एउटाले बोले पनि मार्छ,
अर्कोले खान दिँदैन गफैले टार्छ ।

केहि फरक पर्दैन हामीलाई
शासकले कुरा हुनेखानेका गरुन् कि हुँदा खानेका
हामी त केवल बटुवा न हौँ
एउटाले जाँदा लुट्छ,
अर्कोले फर्कदा बाटो ढुक्छ ।

केहि फरक पर्दैन हामीलाई
शासक व्यालेट लिएर आउन् कि बुलेट लिएर
हामी त केवल वस्तु न हौँ
एउटाले कौडीका भाउमा किन्छ
अर्कोले खोसेर लिन्छ ।

केहि फरक पर्दैन हामीलाई
शासक रावण हुन् कि राम
हामी त केवल सीता न हौँ
एउटाले दासी वनाएर पाल्छ,
अर्कोले जिउँदै आगोमा हाल्छ ।

केहि फरक पर्दैन हामीलाई
शासक पाण्डव हुन् कि कौरव
हामी त केवल द्रौपदी न हौँ
एउटाले जुवामा हार्छ,
अर्कोले सभामा नाङ्गेझार पार्छ ।

हेटौंडा– ४