नेपाली हास्यव्यङ्ग्य अनलाइन पत्रिका

मुकुण्डेलाई काँसी दिउँ
भकुण्डेलाई फाँसी दिउँ
लाज पचेका लबस्तरा
आमा बेच्ने नकचरा
जिब्रो ठूलो पड्काउने
काम गर्नलाई अड्काउने
यी सबैलाई मासी दिउँ
मुकुण्डेलाई काँसी दिउँ,
भकुण्डेलाई फाँसी दिउँ ।

तेरो तिर बल आयो
मेरो तिर दे भन्ने
अस्ती तैँले खाको थिइस्
पालो मेरो ले भन्ने
राष्ट्रप्रेमी बताउने
खुल्लामञ्चलाई तताउने
जनसेवी भन्दिने
जनता सबलाई अत्ताउने
चुर्ना पर्या बाख्राझैँ
सभा तिर कुर्लिने
चोर्न, ठग्न नपाए
सोझा माथि उर्लिने
सिमा तिर हेर भन्दा
आँखा चिम्ली घुर्दिने,
यी सबैलाई मासेर
दिल खोलेर हाँसी दिउँ
मुकुण्डेलाई काँसी दिउँ,
भकुण्डेलाई फाँसी दिउँ ।