शम्भु जमरकट्टेल हेदाङ्नेहाँस्नु कि रुनु ?
औँलो दिँदा
डुँडुलो निल्नु
‘सु’ गर्ने बाहेक
केहीमा मन नमिल्नु ।
कर छल्नु, नतिर्नु
विदेश पुगेछि घर नफिर्नु
ऋण लिनु
तिर्ने कुरै नगर्नु ।
सभामा सिगरेट पिउनु
सडकमा थुक्नु
दिसा बस्नु
न त हात धुनु न त लाज मान्नु ।
नसक्ने खालका
काम आँट्नु
अरुलाई नसकेपछि
आर्फैलाई ढाँट्नु ।
इतिहासको गीत साँच्नु
वर्तमानमा उँघेर बाँच्नु
अरुकै ताली र सङ्गीतमा नाच्नु
सिर्जनाका लागि सिन्को नभाँच्नु ।
पर्चा छर्नु
नेपाल बन्द गर्नु
विकासका नाममा
गाउँबाट सहर सर्नु ।
काखी गन्हाउनु
जुम्रा पाल्नु
कानमा सधैं तेल हाल्नु
उल्टो कदम चाल्नु ।
सधैं अरुको
इसारामा चल्नु
पुच्छर ठडिनु
शीर ढल्नु ।
काम नसकिँदै
अफिसबाट भाग्नु
सधैं चाकडीको
दाउमा लाग्नु ।
कृषक बन्नु
अन्न किन्नु
आफ्नै नाभीको
कस्तुरी नचिन्नु ।
नदी बेच्नु
बिजुली किन्नु
नून र पेट्रोललाई
डलर तिर्नु ।
उमेर नपुग्दै
बिहे गर्नु
उमेर पुगेपछि
अर्कोतिर सर्नु ।
अरूलाई सधैं
धारे हात लाउनु
साँढेका पछाडि
मुख बाउनु ।
अरूकै बारीको
डल्ला फोर्नु
अरूकै मल र
गोबर सोर्नु ।
यतिका धेरै
विशेषता सहित
अरू होइन
नेपाली हुनु
यही भीडमा छु म पनि
हाँस्नु कि रूनु !
झापा, हाल काठमाडौं
